中環出更：紅酒 磚頭 藍籌名媛投資 各有所好
環球股市疲弱，港股震到散晒，有名媛早就放棄買股，轉為投資靚紅酒。「鯊魚女」陳細潔（Abbie）話，股市波動太大，為免食「驚風散」，十多年來投資法國靚紅酒，家中珍藏逾千支名酒莊嘅紅酒，每支年年升值，每年穩賺百分之十。Abbie不時出席紅酒拍賣會掃貨，可惜因為知名度高，內地豪客見佢舉手，即時瘋狂搶埋一份，P:搶高晒啲價錢喎。
尋日保良局一眾高層為一年一度保良慈善騷《星光熠熠耀保良》做宣傳，安排喺九月十七日登場，除咗Abbie撐場外，仲有主席龐盧淑燕、副主席賭王四太梁安琪、鄭錦鐘（Eric）、玩具大王蔡志明太太蔡李惠莉等。講到投資心得，四太認為揸磚頭最實際，近日樓市回落，正係入貨良機，佢首選優質地段：「單位細啲都無所謂，千祈咪貪大、貪平，地點最緊要。」
龐太都係投資高手，趁日前股市插水，掃入幾隻優質藍籌股長揸。龐太一心多用，早前同家人同遊美國羅省，坐郵輪歎世界，仲狂掃名牌披肩同冷衫，滿載而歸。
保良「橋王」搵冠名贊助
講番保良騷，有保良「橋王」之稱嘅Eric擔任節目籌委會主席，佢破天荒提出搵冠名贊助，獲副主席朱李月華拍心口支持，搵老公朱沃裕間公司以七位數字贊助，Eric開心過中獎，猛讚老友夠義氣。
蔡李惠莉都唔執輸，係金鑽贊助人，佢近排忙慈善同湊孫，無時停。公子蔡加讚同女友汪圓圓愛得甜蜜，但蔡太話，囝囝只得二十五歲，仲細個，唔心急飲新抱茶喎。
卓妮