中環出更：黃進達去交流無幫襯屋企
遊學交流成為學習新趨勢，康泰旅行社都睇準時機喺呢幾年大搞遊學團。不過，康泰太子爺黃進達（Jason）就好坦白話，佢以前去嘅交流團都唔係跟康泰去，因為當年佢哋仲未搞遊學團咁話，大嘆「當年冇依家咁幸福」，佢惟有自己問外地朋友有咩課程啱讀，爭取去外國邊學邊玩喎。
今年贊助39學生遊學
康泰今年連續第十年贊助高考狀元同有傑出表現嘅中學生免費去遊學，Jason尋日出席狀元遊學團誓師儀式時，就憶述中學時代嘅遊學經歷，佢話當年去過唔少遊學團，中國、歐洲主要國家統統都去過，但就唔係跟屋企間康泰去，佢話：「當時未有咁幸福，康泰仲未贊助學生去外地遊學交流，我惟有自己搵，透過當地朋友介紹有冇語文課程，一邊學一邊去附近遊覽，但都係以玩為主。」
Jason又話，當年主要係靠自己嘅利是錢去遊學，屋企只係贊助少少，但屋企開旅行社，訂機票就方便好多。
康泰今年嘅狀元遊學團一共有三十九人參加，Jason唔會隨團出發，只係會做前期準備工作，但爸爸黃士心身為康泰董事長就會隨團一齊去喎。
卓妮