痛失母親子斥無天理
【本報訊】死因庭雖批評屋宇署及大業主等在塌樓慘劇中有過失，但對於一直希望透過法庭還死者公道的家屬來說，「死於意外」卻無法遂他們心願。飽受喪夫之痛的蔡道強妻子李翠新聞判後感痛心，年多來心情逐漸平復的她再次因失望而落淚，只希望被她形容為「殺人兇手」的屋宇署能認真吸取教訓避免慘劇重演。痛失母親的盧建華兒子肖華亦感不滿，直斥「無天理」。
需到精神科覆診
蔡太昨得知裁決後甚感激動，「好痛心，亦都好意外，呢件事根本唔應該係意外！」她認為屋宇署及大業主均需分別負四成責任，工程承辦商朱偉榮則佔其餘兩成，「人死咗，樓冧咗，做咩都返唔到轉頭，只想死者死得有價值，係咪要冧第二次先識驚？」
「點解唔係判非法謀殺或者誤殺？屋宇署嘅行為同幕後殺人兇手一樣！」她至今仍會不時情緒激動，每隔三個月需向精神科醫生覆診，「最初有諗過自殺，成日諗當時點解唔可以同老公去，好彩有朋友、家人同同事支持先撐到落去」。她坦言考慮過提出索償討回公道，但怕要再出庭憶起傷痛，仍需與家人商量。