政情：留學生拍片撐競爭法
《競爭法》拖咗咁耐仲係甩甩漏漏，仲傳聞話會變為無牙老虎。一班留學生睇唔過眼，話政府講嚟講去都講唔到重點，搞到唔少商界都怕怕，索性自己動手，拍咗條片擺上網宣揚法例。其中有份拍片嘅留英學生陳振良（David）話，喺英國讀書時，自己就係《競爭法》受惠者，就算特區政府幾唔識做，自己都想幫香港做番啲嘢。
其實班有心學生係公民黨議員辦事處嘅實習生，現時喺倫敦政治及經濟學院讀緊法律嘅David話，當年讀緊中學時，幾間學校合謀定價，搞到學費好貴，好彩英國政府立咗《競爭法》，令學費平番唔少，先至唔使咁辛苦儲錢交學費。
David話，由於自己係受惠者，所以同班港大學生拍咗條短片，除咗解釋《競爭法》係咩一回事，仲有晒例子講解，而且分成四集擺上網，包唔會睇到悶。連留學生都咁有心思，仲咁有心拍埋條片宣傳，好心商務及經濟發展局局長蘇錦樑學下人哋，咪咁故步自封啦。