政情：星屑醫生 踩入黃埔東插旗
一直盛傳會喺年底區議會選舉上演三女混戰嘅黃埔東選情或有變，事關有意落場嘅選民力量前港姐袁彌明（Erica）或會抽身，改由核心成員「星屑醫生」歐陽英傑出戰，明日仲會落黃埔東做宣傳，據聞人民力量立法會議員黃毓民到時都會幫手站台，相信兩女對一男會有另一番新景象！
我哋尋日搵過星屑醫生，佢好老實話，為咗應對當前變幻莫測嘅政治形勢，佢哋正考慮安排Erica落中西區挑戰民主黨立法會議員甘乃威，皆因佢哋近日察覺原本打算喺黃埔東出選嘅民主黨新星黃碧雲似乎有啲異動，所以選民力量決定變陣安排佢落黃埔東做吓嘢，睇睇反應先再作決定喎。
星屑醫生仲話，為咗今次落區，佢特登整咗條新橫額出嚟諷刺其餘兩位疑似對手，上面會印住「美芬與碧雲，根本一類人」喎。問到佢如兩位疑似候選人走嚟投訴佢會點應對時，醫生笑笑口咁話，若然兩人真係反面嘅話，佢會即時答：「你兩個都係女人囉！」哈，又幾好諗頭喎。