政情：楊哲安要瘦身 樂做單車男
高官向來錫身，經常坐喺冷氣房更易肥。教育局政治助理楊哲安（Jeremy）去年為咗Keep Fit，風雨不改踩單車返工，懶理一身臭汗，總之要瘦。Jeremy嘅前藝人太太張燊悅都崇尚環保，現時讀緊個環境管理學碩士課程，經常提醒佢要慳電、減排，所以屋企要減少開冷氣。
早前出席一個活動上見Jeremy塊面尖咗又瘦咗，原來係勤做運動有功。佢自爆去年九月開始，每朝由薄扶林屋企踩單車返中環政府總部，全程只需二十分鐘，一星期踩足五日，稱得上係「官場單車小子」。
大熱天時喺馬路上飛馳，想唔標汗都難。Jeremy話，返到政府總部後會用毛巾抹身，避免做「汗男」，但近期艷陽高照，所以都暫停踩單車，免得一身汗味嚇親同事。今個暑假，Jeremy都懶得出門，佢笑言大女Lucy只有兩歲半，細女Lily更只得十個月，分唔清英國同北角有乜分別，等佢哋大啲先再去過喎。