政情：陳家強畀晒位都唔識上
政府一早講咗派六千元詳情，但財經事務及庫務局局長陳家強，尋日又大鑼大鼓開記招再講一次，唔知係咪想幫諸事不順嘅夕陽政府沖喜吓呢？既然記招了無新意，記者索性問吓陳家強攞唔攞六千元？攞咗嘅話又會點用呢？真係畀晒位佢上，可惜佢捉到鹿都唔識脫角，反觀銀行界代表就醒目得多。
陳家強笑笑口話，派錢係政府還富於民嘅措施，每個市民都可以選擇做登記，明顯係想迴避問題。之後再追問佢用乜嘢方法登記攞錢，攞完又會唔會用喺本地消費，振興吓香港經濟呢？陳家強又話：「我未諗到咁遠住」。其實佢只要大方啲話，佢攞錢後會捐出嚟，甚至得體啲可以話「等市民攞晒錢之後，我先至去攞」，話唔定民望因此而見起色添。
相比之下，中銀（香港）分銷網絡副總經理陳家沛就醒好多，佢自言已經喺中銀有戶口，而且經網上銀行登記好簡單，睇嚟佢都係循此路登記攞錢，識得乘機幫公司推銷，真係高下立見。