大家應該聽過，有一種講法叫做「熱鍋上的螞蟻」，咁又有冇聽過「熱氣上的蟻民」？如果未聽過，今日不妨等功夫茶同大家講一個古仔。
石硤尾白田邨有一個成長希望基金會王統元（費愛麗）夫人中心，呢一個社區中心兩年前隆重開幕，成立目的當然係為街坊街里提供服務啦。之不過咁，社區中心少不免安裝冷氣，而且係分體式，即係室外要安裝散熱機嗰一隻。你知啦，炎炎夏日好多時候冷氣長開，結果散熱機噴出大量熱氣。社區中心總共有十七部分體式冷氣機，室外造成嘅熱氣騰騰都咪話唔得人驚，甚至可以話係蒸籠效應，一個唔覺意身處其中，你就係蒸籠裏面嘅人肉叉燒包。
好衰唔衰社區中心隔籬就係白田邨第十座，散熱機基本上就係兜口兜面噴到正，受影響範圍高達攝氏四十度。好嘞，假設你係白田邨第十座住客，你會唔會覺得自己係「熱氣上的蟻民」呢？熱氣難熬固然係一個問題，另一個問題係熱氣形成水氣，地面濕滑曾經害到人跣腳，大話夾好彩冇嚴重受傷咋。
對於呢一個熱氣襲人嘅擾民現象，過去兩年深水埗區議會都有跟進，上月底仲再一次開會討論添，議題其實好簡單，不外乎要求大業主房屋署改善問題。正常嚟講，房屋署可以做嘅亦都好簡單，一於勒令社區中心諗辦法唔好再擾民，話之你熄冷氣又好，甚至乎安裝隔熱板都好。
講到呢度，古仔嘅高潮出現嘞，房屋署兩年以來一直坐視不理，任得「熱氣上的蟻民」叫苦連天，原來背後牽涉官場禁忌。即係咁，社區中心其實大有來頭，成長希望基金會嘅贊助人係曾蔭權，基金會董事局義務副主席係公開大學校長、行政會議成員梁智鴻胞弟梁智仁，義務委員包括前房屋局局長黃星華。兩年前之所以話係隆重開幕，事關嘉賓包括第一夫人曾鮑笑薇，以及教育局局長孫明揚。
功夫茶考考大家，小小幾個房屋署職員敢唔敢太歲頭上動土，走去驚動曾蔭權贊助嘅社區中心？所以咯喎，呢家嘢咪就係欺善怕惡囉，官僚都畏懼權貴㗎，寧願犧牲蟻民福祉，任得白田邨民熱到變蒸蟻。
呢嗱嗱嗱，功夫茶唔奢望房屋署一夜之間改變奴才性格，只係有一個卑微願望。曾蔭權呀曾蔭權，你睇完呢一個古仔之後，好心你主動下令由閣下贊助嘅社區中心改善問題啦，一來顯示你唔係漠視民生，二來顯示你唔係徹底無能，冇理由咁都唔去福為民開啩！