笑看天下：(目及)吓(目及)吓笑着收工

市民面對通脹肆虐，感到日子難過，六千蚊派到依家股瀉金漲都未到手。而鬍鬚曾日日返政府總部，從冷氣房車出來，眼鏡一片迷濛水氣對住電視機鏡頭：小心投資風險，我哋會密切監察事態嘅發展，確保股票市場運作正常。話口未完，港交所供上市公司發布通告及業績的「披露易」網站竟被黑客入侵，拖累包括滙控及港交所在內的七隻股份破天荒集體停牌，散戶沽貨無門被害到雞毛鴨血。

鬍鬚曾日日扮演人肉錄音機，吹來吹去三幅被，老朽硬是不明白佢日日「密切監察」有乜作用？吓吓，你估你隻眼係天眼通？吓吓，播吓聲帶，一樣無能為力令「金融運作有秩序進行」，一如佢喺網誌所噏：市民慘變輸家，無疑令人搖頭嘆息。真係正一烏鴉嘴，好嘅唔靈醜嘅中晒！

最好笑係鬍鬚曾又廢噏「在未來一段時間內，美國國債仍是全球主要的投資工具」。鬍鬚曾真係未瞓醒，睇唔到國家領導人憂外圍造成不穩，要求有關各國切實採取負責任的財政政策、妥善處理債務問題，內地官方喉舌亦發表文章責難美國，要求對方正視自身債務問題，並確保中國手上美債安全。

看來，鬍鬚曾再多兩眼，夕陽西下，佢就安全有秩序笑着收工。