政情：梁榮武寸爆氣候逃犯
煲呔曾施政冇樣掂，仲曾經被環保團體封為「氣候逃犯」，結果搞到灰頭土臉，樣衰至極。一班關心全球暖化嘅有心人，早就對夕陽政府喺呢方面施政交白卷感到不滿，尋日天文台助理台長梁榮武出席世界宣明會舊書回收活動時就話，好多領袖對全球暖化問題都採取苟且偷安心態，今趟煲呔曾真係食到應一應。
梁榮武都係活動主禮嘉賓之一，佢向宣明會捐出一本叫做《喚醒69億隻青蛙》嘅書籍，原來所謂69億隻青蛙，正正就係指全世界所有人，中國有句諺語叫做「溫水煮蛙」，呢本書就係希望所有人都正視全球暖化問題，否則最終會好似溫水中嘅青蛙，畀人煮熟都唔知。
全球暖化苟且偷安
佢仲話，世界上好多領袖，處理全球暖化問題時都會抱住苟且偷安嘅心態，明明知道氣候變化勢不可當，但就硬係唔認真處理，淨係識得將責任留畀下一代。雖然梁榮武冇指名道姓話煲呔曾係咪佢所講嘅「領袖」之一，但既然煲呔曾被封為「氣候逃犯」，佢唔對號入座都唔得啦！