政情：周總臨別港鐵省招牌
即將於今年底離任嘅港鐵行政總裁周松崗，尋日發表任內最後一份業績報告，佢對於在任期間嘅港鐵發展，感慨良多。周總有備而來，突然拎起首次發表嘅○三年度業績報告，話當時有好多興建中嘅鐵路項目至今已經落成，並不忘省靚港鐵招牌，話全部都係團隊嘅努力，祝願港鐵下一站前程錦繡。周總退休後，港鐵CEO一職將由現時美國最大客運機構紐約市都會運輸局主席兼行政總裁韋達誠擔任。
謙稱貢獻一小部分
尋日業績發布會上，周總被問及做港鐵CEO以來，最有成功感係乜？周總話，成功就唔敢當，但隨即拎起佢上任後首次發表嘅○三年度業績報告同相關資料。佢話○四年三月發表業績報告，當時報告提到竹篙灣支線（現時嘅迪士尼線）、東涌旅遊吊車（昂坪360纜車）等項目嘅進度，如今已相繼落成，全賴團隊百戰不撓嘅毅力。仲好謙話自己其實只係貢獻一小部分啫。
至於曾被視為新任CEO大熱人選嘅港鐵財務總監梁國權，就喺業績發布會後話自己都支持韋達誠做港鐵CEO喎。