政情：大孖沙唔撐「關愛」勢爛尾
「關愛基金」由疑似特首候選人之一嘅政務司司長唐英年親自掛帥監督，被外間譏為「競選基金」，同時令未想押注嘅商界人士對捐款都左顧右盼，搞到啲關愛基金委員好頭痕，惟有「腦震盪」諗計撲水。據聞有人曾破格提出畀大孖沙捐錢後可以出風頭威威，但隨即惹來「官商勾結」質疑而無疾而終。唐唐若再諗唔出絕世好橋撲水，有出無入嘅關愛基金想唔爛尾都幾難。
「表彰」恐激化仇富情緒
煲呔曾喺去年施政報告宣布成立「關愛基金」，然後卸咗畀唐唐負責，原先希望政府同商界各出五十億元助弱扶貧，但經過大半年嘅努力後，商界只係認捐咗十八億，當中實收只有六億八千萬元，仲欠三十二億元未有着落，還記得民政事務局常秘楊立門當時死撐話，其實係政府未發力全速向商界募捐喎，不過，夕陽政府口惠而不實嘅謊言好快就不攻自破。
據聞有關愛基金中人見到商界募捐情況咁差都嚇咗一跳，認定大孖沙唔肯「揼水」嘅主因係冇Credit（表彰），所以提出「名利雙收」嘅方案，即係將來有乜嘢活動都叫埋捐款人出席，等佢哋人前人後都有頭有面，但基於唔少人都認為「仇富」情緒強烈，此舉「官商勾結」嘅味道又太濃，為免搞出大頭佛，所以否決咗呢個建議，要再諗過條好橋。
另有人則研判，大孖沙唔肯捐錢畀關愛基金，主因係本身已經成立咗好多基金，話事權亦大好多，犯不着捐完錢仲要睇人面色做嘢喎。
既然氹唔掂啲大孖沙捐錢，關愛基金中人連中小企都唔放過，但明眼人一睇就知係煲無米粥，正如前工總主席孫啟烈話齋，關愛基金一開始就搵晒啲大孖沙捐錢，個個捐幾千萬甚至係幾億元，搞到其他捐幾百萬嘅善長當堂無晒癮，潛台詞即係唔好再打中小企主意。
俗語話「冤有頭，債有主」，關愛基金嘅命運全在唐唐一念之間，如果佢係有承擔嘅，就唔好難為啲下屬，應該親自向大孖沙同中小企募捐，否則現有筆錢搣搣吓遲早所餘無幾，到時關愛基金想唔爛尾收場都好難囉！