中環出更：超市親子樂 雷太滿載而歸
炎炎夏日行超市消暑，係個唔錯嘅選擇，如果有優惠就更吸引。City’super為慶祝十五周年，過去兩日為客人提供折扣優惠，卓妮就喺中環ifc商場間分店遇到九巴家族後人雷兆光太太雷林靜怡（Jane），拖住一對寶貝仔女悠閒購物，大家試食吓凍肉、買吓麵包，最後仲抽到份禮物，確係滿載而歸。
Jane係中環常客，連買餸都揀番喺中環，夠晒就腳，卓妮亦遇過佢好多次。前日下午三點半鐘，佢帶埋放緊暑假嘅仔女出動，大仔話咁快就嚟有媽咪咁高，真係快高長大。Jane同仔女推住買餸手推車，一路有傾有講，親子關係唔錯。期間Jane巧遇一位男士，兩人寒暄幾句後，Jane又繼續買嘢。
囝囝抽中小禮物
當日會員有折扣優惠，買凍肉及生果有八折，所以佢哋都喺凍肉、醃肉嘅櫃位逗留頗長時間。期間售貨員好識做，切啲食物畀佢哋試食，自然氹到靚太入咗唔少貨。買完嘢之後，佢哋仲憑單換領禮物或現金券，結果佢囝囝抽中份小禮物，認真開心。
卓妮上前同Jane打招呼，佢話自己鍾意買餸，但唔會親自落廚，多數畀家傭同埋老公炮製。唔講唔知，原來雷兆光煮嘢好叻，尤其係整牛扒同雞扒，Jane盛讚老公下廚好味過五星級酒店，相信雷生聽到一定好開心啫。
卓妮