收錢提供性服務有好多種講法，最直接當然係話做雞啦，比較有文學色彩嘅講法就係墮落風塵，至於潮人潮語咯喎，援交係新興講法。
如果功夫茶冇記錯，援交嘅發源地係日本，全稱援助交際。雖然都係收錢提供性服務，不過援交經過包裝之後變得似乎冇咁折墮，因為服務提供者會自我安慰：唓，我交朋結友之嘛，佢資金援助之嘛，我唔係做雞！
當然啦，任你點樣包裝都離不開一個事實，援交即係賣淫。如果小朋友覺得援交係一種可以接受嘅生財之道，功夫茶不妨醒你一句，你真係又蠢又犯賤呀！
好可惜現實世界有太多心智未成熟嘅小朋友，竟然將援交視作一份暑期工，而且愈來愈多未夠秤嘅童工。冇耐前之嘛，警方打擊網上援交活動，被捕者當中居然有十四歲女淫媒，以及十三歲援交男，顧客有男亦有女。大佬，十三歲乳臭未乾就淪為洩慾工具，未到三十歲睇怕都已經變咗飽歷風霜老人精。
少男少女援交到底有幾嚴重？本報女記者親身邀約過一隻援交鴨，聲稱來自綜援家庭嘅佢係十八歲中七重讀生，網上徵求十八至三十歲女性伴侶。女記者以網友身份聯絡啦，對方承認自己援交。
後生細仔之所以賣淫做鴨，原來呢一位哥哥仔有一套歪論，認為援交不但有性伴侶，同時又可以賺錢交補習費。亦即係話，援交鴨嘅心態係又食又拎，可能呢啲就叫做「色慾男兒軟飯王」啩。正常人肯定唔會有咁荒謬嘅諗法，不過家陣嘅少男少女好難講，新一代道德觀念十分扭曲。
唉，學生妹又賣淫，學生哥又賣淫，到底香港嘅教育工作者點搞㗎？功夫茶想問一問教育局，學校除咗變成集體吸毒嘅迷幻樂園之外，會唔會進一步成為扯皮條同援交男女嘅接客基地？雖然功夫茶暫時唔相信課室會淪為妓寨，之但係同學仔之間互通消息跑私鐘，咁都已經眼冤啦！
教育局又話提倡德育，可惜主要目的係洗腦，企圖令到學生盲目愛國。計功夫茶話齋，真正嘅德育係要令到學生做一個唔會行差踏錯嘅人，即使做唔到君子淑女都唔好做壞人，做雞做鴨做淫媒梗係唔應該啦，而且隨時犯法。
喂喂喂，學校唔係有性教育嘅咩？功夫茶建議各位老師，開宗明義就要教導腦囟未生埋嘅小朋友，援交等於賣淫，賣淫等於折墮，折墮等於自毀。嫖客好多變態㗎，一個唔覺意命仔都冇。
講到尾都係教育官僚腦殘，居然教出凡事向錢看嘅援交男女，失敗！