政情：白富鴻冧市掃平貨
全球大冧市，小股民驚到瞓唔着，不過「燕之家」老闆白富鴻就話港股市盈率仍低，唔怕趁低吸納，但炒樓就咪搞嘞，佢仲自爆，話自己手上嘅樓都揸少咗。
白富鴻未做燕窩生意前，曾任職地產代理，對樓市瞭若指掌。佢承認，曾經同友人夾份買樓投資，持有幾多單位就唔講嘞。近日樓市嚇到急煞停，唔少豪宅更劈價兩成，白富鴻話唔敢貿然入市，驚外圍環境轉差，香港難以獨善其身，揸住疊樓，隨時有價無市。睇番股市，反而有得諗，事關港股經過大調整後，好多優質藍籌市盈率仍低，極之抵買喎。
白富鴻卸任唔做菁英會主席後，呢排熱衷做地區工作，尋日三十幾度高溫下，佢企喺中區半山扶手電梯一帶。搞乜？原來佢早前以半山社區事務促進會主席身份，就伊利近街行人天橋流量問題做咗份問卷，調查結果出咗，一於公諸同好分享吓。