政情：張建宗借王國興放箭
現任勞工及福利局局長張建宗上任前受到廣大勞工界代表歡迎，大家話佢係一個真正關心基層同打工仔嘅官，喺工聯會「票后」陳婉嫻同職工盟劉千石等重量級人物大力舉薦下，終於喺○七成功做到局長。所謂得人因果千年記，張局長近幾年同工聯會都叫有傾有講，尋日出席工聯會立法會議員王國興地區辦事處開幕禮時大派高帽畀工聯會，仲趁機諷刺有議員「無的放矢」，唔知佢暗踩緊邊個呢？
張局長尋日行色匆匆，喺開幕禮場地逗留唔夠半粒鐘就即閃，不過唔好以為佢唔畀面工聯會喎，實質係佢之後另有工作，不過為咗畀面工聯會，即使幾咁趕時間都要去坐一坐。張建宗致辭時堆砌咗一大堆客套話，話王國興佢哋努力喺立法會發聲，反映市民意見同聲音，令到下情可以上達，所以佢自己好重視工聯會意見。本來呢啲笠高帽式嘅對白，大家理應唔使太過關心，反正去得開幕禮，都一定係讚㗎啦，唔通會話你做得唔好，叫大家唔好支持你咩！
不過聽真啲，原來張建宗話中有話，佢竟然爆咗句話王國興表達意見時絕非「無的放矢」，又話佢發言理據、背景同訴求兼備，係政府重視嘅聲音咁話。嗱，呢句就可圈可點喇，話王國興唔係無的放矢，即係話立法會裏面有人對政府官員無的放矢啦，到底張建宗想話邊個先！
我哋唔知張建宗內心點樣定義無的放矢，但如果諗深一層，做官唔係應該正反意見都要聽嘅咩？理論上唔應該偏聽㗎喎，唔通以前喺勞工界心目中係好官嘅張局長已經受到煲呔曾「親疏有別」嗰一套同化？如果真係咁，就真係打工仔悲歌喇。
曾畀長毛掟膠樽
張建宗係甩漏較多嘅局長，較久遠有外傭稅事件，早幾個月就有交通津貼，佢仲因為交津做得不得民心，喺立法會畀「長毛」梁國雄掟膠樽添。「長毛」掟膠樽都唔係無的放矢，佢嘅「的」咪就係要表達張建宗做交津做得唔好囉。做人最緊要識自省，唔自省而搵機會踩人，對自己有乜好處？