中環出更：姚珏初登銀幕演回自己
享譽盛名嘅小提琴演奏家姚珏，其音樂造詣之高人盡皆知。佢遲啲仲會粉墨登場走上銀幕添，佢飾演小提琴高手，即係做番佢自己。
今日就要飛往上海拍戲嘅姚珏，拍攝四場戲份大約需時半個月，套戲講佢如何去鼓勵梁詠琪同任賢齊呢啲樂壇後進。行事向來認真嘅姚珏認為，音樂同拍戲都係一種藝術，因此都會好用心咁去演繹。佢不但會親自演奏電影中主要音樂，仲會指導兩位主角嘅演奏姿勢，務求做到最好。如無意外，呢套由黃珍珍所執導嘅電影將會喺聖誕期間上映，真係令人引頸以待。
雖然姚珏嘅處女電影作暫未問世，但係佢尋日出席香港高級視聽展做表演嘉賓，就真係令到一眾粉絲如癡如醉。現場有一對價值三百多萬元嘅揚聲器嚟配合精湛嘅現場演奏，仲因應新唱片發行而搞咗個簽名會。姚珏話今次新唱片係去年慈善音樂會嘅錄音，製作水準之高令佢非常滿意。不過姚珏唔會因此而滿足，佢話下一個目標係挑戰有深度嘅巴哈樂章，因為要有番咁上下人生歷練至可以有精彩演繹。
音樂神童 雲集香江
講開音樂，四位音樂神童最近齊集香港，與香港城市室樂團合作演出《音樂神童全接觸》音樂會，其中之一就係港產嘅鋼琴家沈靖韜。靖韜今年已經十五歲，最新嘅造型係箍咗牙，佢話唔認為自己係神童，因為神童應該係一出世就識音樂，唔使人教。其他三位神童包括美籍華裔大提琴手陳宗道、喺美國出世嘅小提琴手西蒙娜‧波特同年僅十九歲嘅英國年輕指揮兼作曲家亞歷山大‧普萊爾。佢哋今次合奏普萊爾嘅新作《沉默的秘密》，演出激情澎湃，就好似青春一樣，充滿活力。
卓妮