有一條ＩＱ題係咁問嘅，星期日最多菲律賓人嘅地方係邊度？如果你答中環，咁就中招嘞，正確答案係菲律賓。不過咁呀，遲啲呢條問題嘅答案，可能真係變咗香港嘅中環都未定。
大家咁聰明，梗係估到功夫茶想講乜啦。無錯，外傭爭取居港權官司即將開審，如果港府敗訴，咁就大件事囉，理論上現時居港滿七年嘅十二萬五千名外傭即時自動成為香港永久性居民，可以申請公屋、自由搵工，仲有權攞綜援添，對香港社會造成嘅震盪，直情係一個超級大炸彈。
最大鑊嘅係，香港雖則被港府搞到烏煙瘴氣，但係對好多人嚟講，仍然算係一片樂土，若然外傭擁有居港權，容乜易申請佢哋嘅老公仔女來港團聚，香港豈不是隨時陸沉？所以話，有朝一日中環成為最多菲律賓人嘅地方，唔係無可能㗎！
好嘞，既然呢場官司對香港影響咁深遠，港府又有何對策呀？本來呢，最有效嘅做法係提請人大釋法，一錘定音裁定外傭冇居港權，咁就乾手淨腳嘞。可惜港府捨易取難，喺終審法院有終極裁決前都唔動用呢把尚方寶劍，反而決定一旦官司敗訴，即刻向法院申請暫緩執行裁決，然後先至考慮釋法喎。
嗱嗱嗱，外傭爭取居港權，照計就贏面唔大嘅，話晒香港僱主有責任出糧畀佢哋啫，無義務畀佢哋入籍吖嘛。之不過咁，弱勢政府百事哀，港官做事極之蝦碌失魂，大家都見識過㗎啦，過往打親官司，餐餐都衰收尾，莊豐源案係咁，領匯上市案係咁，港珠澳大橋環評官司又係咁，所以咯喎，今次居權訴訟確實令人相當擔心。
最簡單吖，官司一旦敗訴，港府申請暫緩執行裁決，係咪十拿九穩先？萬一又有乜甩漏，例如法庭拒絕接受，咁咪一鑊泡？各位高官唔好唔記得，港珠澳大橋環評官司開審前，夠冇人諗到港府竟然會輸畀一個綜援阿婆啦。
正如有立法會議員話齋，今次官司港府嘅贏面只係一半半，與其搵香港七百萬人嘅福祉博一鋪，點解唔及早提請人大釋法，一了百了呢？開講都有話啦，唔怕一萬，只怕萬一吖嘛，呢單官司咁重要，港人唔想日日食驚風散呀！
當然，唔係個個都咁諗嘅，被指係官司始作俑者嘅公民黨大狀就堅決反對釋法嘞，仲講到官司一旦敗訴，隨時有數十萬外傭同家人湧港嘅講法係危言聳聽添。即係咁，大狀唔信人哋嘅數字，咁佢哋自己有冇相關數據在手呢？如果冇，即係純粹齋噏，咁係咪兒戲過細路哥玩泥沙呀？
一句講晒，居權官司難逆料，拆彈宜早不宜遲。港府仲唔快啲做嘢，唔通真係要睇住香港淪陷！