特首選舉已嗅到火藥味，最過癮的是唐唐，佢度假要緊，搞到挺佢嘅商界名人急如熱鍋上的螞蟻，都唔知點幫佢造勢，只能蒼白無力地話佢雖然常口窒窒，但講得出做得到。
唐唐乃北京有意培養，加上是富家子弟，又有商界及公務員支持，熟悉政府架構及實際行政經驗，照理如果佢唔係條條fing，睇怕贏面壓一。人格心理學的當代研究表明：性格一旦定型，幾乎終身不變，老朽為唐唐危。
大家都睇到「疑似參選人」振英哥的努力，佢真係有「紅軍不怕遠征難」的鬥志，哪裏有需要就去哪裏，都可見到佢親切笑容在論政，果然當仁不讓。
唐唐的唔嗲唔吊，相對於振英哥的勇往直前，且暗示自己有班底又有各方面嘅人才，難怪挺佢嘅名人話：振英哥即使未獲中央祝福，都應該畀佢入閘。
其實，奇迹往往在堅持中。有個數學題：一件事的成功率是百分之一，反覆嘗試一百次，至少成功一次的概率是多少？備選答案有：百分之十、百分之二十三、百分之三十八、百分之六十三。據調查唯獨正確答案百分之六十三無人選。成功率是百分之一，即失敗率是百分之九十九，反覆嘗試一百次，那失敗率是百分之九十九的一百次方，約為百分之三十七，最後的成功率是百分之百減去百分之三十七，即百分之六十三。
振英哥乃資深測量師，計算至叻，一定深明奇迹往往在計算中，成功率逾六成，博一博分分鐘單車變摩托，何況他還年輕。