話說公民黨社區服務主任劉冠亨，尋日下晝喺中心舉辦「一蚊學生相攝影活動」，收費係一元半打相、兩元一打，兩打就四元，幾乎係象徵式收費。我哋問過中心代表，佢哋話中心出租場地準則，一向都係不分政治左中右，只要場地時間許可，活動又係服務居民，佢哋都無任歡迎，以前工聯會都租過佢哋個場啦！
我哋又發現，西貢區區議員方國珊近日大手筆派完「幸福手拉車」後，又推出「將軍澳仲夏夜晚宴」，菜式包括鮑參肚羹、海石斑及乳豬等，仲有表演同抽獎，兼且獲送一部手拉車，又食又拎每位都係收一百多元，又係半賣半送，真係抵到爛，但就未聽到有人投訴佢。