政情：白鴿狙擊鼠王冇着數
專業會議立法會議員梁美芬（鼠王芬）因為「選民懲罰論」搞到人氣同形象大插水，佢嘅九龍城區議會黃埔東選區議席受到各黨派狙擊，包括前落選港姐嘅選民力量袁彌明及白鴿黨黃碧雲。原本黃碧雲因為早前參加終極普選聯盟令人氣一度急升，可惜至今已經攤凍晒，加上有民調顯示鼠王芬仍得街坊支持，分分鐘最後要打退堂鼓棄選。
其實白鴿黨幾個月前已準備狙擊鼠王芬，派黃碧雲落黃埔東做地區工作，又派單張又有街站，開頭聲勢唔錯。但該黨早前喺區內做民調，先發現街坊原來唔係好鍾意黃碧雲。相反，雖然鼠王芬人氣急跌，但調查發現佢仍獲當區選民力撐，莫非鼠王芬嘅鐵票真係咁穩陣？
其實黃碧雲出選都係想為明年立法會選舉熱身，但按現時形勢，挑戰鼠王芬必輸無疑，與其落場獻醜，不如棄選好過。雖然不被睇好，但黨友涂謹申就話，鼠王芬現時形象插水，如果黃碧雲以泛民主派學者身份出選，未必無機會喎。