政情：工聯兩新星接棒選立會
工聯會內部規定旗下兩名立法會勞工界議員，只可以做一屆四年咁多，之後有能力嘅就轉戰地區直選，唔多掂嘅就要迅速收山，讓番呢兩個工聯會贏硬嘅議席畀新人參選。該會早前揀咗八位新人作重點培訓接勞工界支棒，最近開始浮出兩名熱門人選，分別係工聯會「元老」陳婉嫻嘅愛將，同現任理事長吳秋北嘅嫡系，證明跟着邊個大佬，對最後出唔出到位有莫大關係。
王吉顯陳慶生屬大熱
該兩位熱門人選就係工聯會屬下文職及專業人員總會（文專總會）嘅副會長王吉顯同陳慶生，佢兩個專業背景濃厚，而且參與工會工作多年，加上年紀唔算大，切合晒工聯會近年銳意年輕化同專業化嘅目標。咪以為兩人名不經傳，查實王吉顯都玩過直選，佢喺○八年就曾經代表工聯會喺九龍東出選立法會，不過就排喺現任立法會議員黃國健同副會長嫻姐後面，結果冇緣入局。陳慶生履歷同樣唔差，從事金融工作超過二十年，更加擁有博士學位，近年仲讀埋心理學添。
除咗專業背景夠厚，兩人喺工聯會嘅人脈亦相當強勁。王吉顯雖然來自文專總會，不過真正後台係票后嫻姐，據講嫻姐對佢青睞有加，認為佢絕對有資格更上層樓，王吉顯因此行情看漲。
來自相同屬會存隱憂
至於陳慶生雖冇領導層支持，但大家唔好唔記得，工聯會理事長吳秋北正係文專總會嘅會長，所謂朝中有人好辦事，各項因素加加埋埋，成為熱門亦不無道理。不過咁，兩位人選其實仲有變數，其中最大隱憂，就係兩人都來自同一個屬會，工聯會旗下其他工會大佬會唔會接受，真係要傾過先知。
講番工聯會勞工界議員只能做一屆嘅制度，原意係想加速培育新人上位，但實際成功例子並不多，近年只有王國興成功轉型喺新界西直選勝出。
最近工聯會又想調派王國興「空降」港島做開荒牛，有人仲篤佢○八年參選新西時，講過只會做一屆，如果佢堅持唔過港島留喺新西，就係背信棄義冇口齒。據講王國興依然好唔想轉區，擔心四年努力化為烏有，到底最終安排係點，相信要到明年先會揭曉。