中環出更：菁英會「才」源廣進
雲集才俊嘅香港菁英會，「吸才」力驚人，除囊括各界精英外，賭王何鴻燊千金何超盈及玩具大王蔡志明公子蔡加讚都話想入會。兩人前晚趁菁英會第四屆執委就職宴現身探路，同班後生仔打成一片。
超盈加讚都想入會
菁英會辦喜事，逾五百位政商界名人紛到賀。超盈都嚟湊熱鬧，原來係應創會主席施榮忻邀請出席，聽講超盈一年前已有意加入菁英大家庭，可惜仲讀緊書，等大學畢業後就入會。超盈笑言，擔心讀國情研習班好難，真係謙。
見兄弟咁團結，忙於幫爸爸打理錶行「喜運佳」嘅加讚都心思思想入會，佢話度好時間後就報名。此外，富二代林忠豪都嚟捧老友場，但未決定係咪入會喎。
當日晚宴氣氛高漲，菁英兄弟上台又唱又跳。新主席洪為民（Witman）全晚滿場飛敬酒，合共飲咗兩支半紅酒，見佢面不改容，睇嚟酒量已經愈練愈厚。
卓妮轉頭又遇見副主席霍啟剛，佢同細佬啟山由頭坐到尾，認真畀面。啟剛預告十一月有大搞作，佢牽頭將全國體操賽首次移師香港舉辦，屆時將有多位金牌體操選手雲集香江，夠晒熱鬧。
菁英會嚟緊盛事多，九月十五日將舉辦博鰲青年論壇，近日四出搵猛人「開壇」，目標包括剛宣布退役嘅中國籃球巨星姚明，仲有「蘭桂坊之父」盛智文，總知粒粒巨星。
卓妮