政情：袁莎妮任總商會CEO遭非議
香港總商會尋日召開董事會，正式通過聘請做咗近廿年政務官嘅袁莎妮（Shirley）接替方志偉做該會總裁。但有商會內部人士批評，總裁嘅遴選過程欠缺透明度。
總商會主席胡定旭接受查詢時回應話，佢哋係先由主席委員會物色合適人選，然後推薦畀董事會，再由董事會投票決定，過程公開透明。據商會消息人士指，Shirley係商會成立一百五十年來嘅第四位CEO，商會並無聘請CEO嘅既定程序。咁即係話，無所謂透唔透明喇。
Shirley係牛津大學一級榮譽畢業生，九一年加入政府，唐英年加入政府做工商及科技局局長，Shirley係唐唐嘅政務助理，之後唐唐做財政司司長都帶埋Shirley過檔，所以大家都認為佢係唐唐愛將。Shirley去年九月離開政府，最後一個崗位係運輸及房屋局副秘書長。佢享受人生差不多一年，終決定去四大商會之首嘅總商會打工，做咗咁多年政府工，今次確係佢人生新嘅一頁。佢會喺本月八日履新。