政情：陳永棋「挺唐」：大熱惹緋聞
「鐵三角」嘅明爭暗鬥愈趨激烈，各名疑似特首候選人嘅班底陸續現身。繼市建局主席張震遠日前率先表態，大讚行政會議召集人梁振英係適合人選，政務司司長唐英年陣營亦不甘示弱，尋日由全國政協常委陳永棋高調「挺唐」，讚到唐唐天上有地下無。問及唐唐盛傳嘅「過去式」緋聞，棋哥形容只係小事，又話正正因為唐唐機會高，先至會惹來呢啲傳聞喎！
否認求一官半職
對於唐唐經常口窒窒講錯嘢，包括「有生之年見唔到失業率回落」、訪港旅客「條條fing」等，棋哥話唐唐係大有成就嘅人，即使講嘢有時口窒同用詞不當，都係值得原諒。問佢搏到咁盡挺唐，係咪想等對方上台之後撈番一官半職，佢直言今年已經六十四歲，明年七月更加係六十五歲，到時先入政府年紀太大。唔知棋哥係咪暗寸緊「鐵三角」之中年紀最大嘅全國人大常委范徐麗泰呢？
范太方面尋日亦有動作，罕有接受烽煙電台節目訪問，批評煲呔曾以至老董政府都冇「攞個心出嚟」同立法會溝通，令行政立法關係一直都冇改善，明顯係想凸顯自己做過立法會主席嘅優勢。
對於盛傳屬於梁振英陣營嘅恒隆主席陳啟宗，日前透過傳媒暗批范太「一事無成」，范太直認冇管理過大公司同大企業，又冇錢請啲大班同智囊幫自己分析政策，但如果話佢冇發表過任何政論同做過任何事，咁就唔太公道，相信市民唔會認同。