政情：哪吒手拉車迎戰叉燒飯
有「哪吒」之稱嘅西貢區議員方國珊，去年退出自由黨後一直動作不斷，最近又獻新猷，訂造一千部買餸手拉車仔派畀將軍澳街坊，擺到明就係要抗衡之前派叉燒飯、又派暖風機嘅自由黨。哪吒今次好諗頭呀，除咗識整部實用嘅買餸車仔畀班街坊買餸外，仲將自己個哪吒漫畫肖像印喺車仔上，並當兩車轆係「風火輪」，認真搞笑。
哪吒話，送呢部手拉車仔全因自己所屬社區交通好唔方便，長者街坊平時買餸都拎得好辛苦，相信有部買餸車仔會舒服啲。佢仲話，今次部手拉車仔係佢個國際歌迷會贊助嘅，而佢過往都不時派嘢畀街坊，好似大時大節都會派吓小禮物咁，所以唔覺得今次有乜特別喎。
不過，呢部買餸車最特別並唔係喺設計或者實用性方面，而係示威道具之一。哪吒話，將來有機會出嚟示威、抗議地區交道網絡設計同配套欠佳時，可以叫埋班街坊拎晒啲車仔出來，證明佢哋平時係幾咁唔方便喎。咦，如果真係咁嘅話，班街坊咪隨時做晒臨時演員囉？