政情：煲呔曾離譜教政協講嘢
自詡「政治家」嘅煲呔曾，剛愎自用搞到民怨載道，話要「玩鋪勁」其實搞到一鑊泡，最近佢仲大言不慚提出十項領袖條件，根本係自吹自擂無樣合格。呢！話口未完尋日煲呔曾就施政報告聽取政協委員意見時，就即場示範將「謙卑態度」、「自省能力」、「重視溝通」三項領袖條件，好似碎紙咁完全粉碎，莫非佢諗住喺任期收尾嗰年放軟手腳，唔再怕班政協上京告御狀？
煲呔曾每年會分別喺三月「兩會」同十月施政報告前與人大政協會面以聽取意見，而且每次聽完意見後，都會好似「塘邊鶴」咁加把嘴評論，但唔知係咪以前講錯嘢出過事，見過鬼怕黑，尋日煲呔曾就「斬腳趾避沙蟲」，每當五人一組嘅政協委員發言後，無即時作出回應，搞到班政協喺歷時一個半小時嘅諮詢會中，好似對住空氣發言咁，煲呔曾有幾重視溝通實在有目共睹。
不過，煲呔曾連「謙卑態度」同「自省能力」都欠奉，話說係諮詢會就快結束時，煲呔曾突然好離譜咁教班政協邊啲嘢講得同唔講得，搞到幾個政協委員事後都話無名火起。
諮詢尾聲突「變臉」
據聞，煲呔曾起初都賣口乖話多謝大家畀意見，但講到尾聲就突然「變臉」，話喺出面有好多記者，大家可以就自己嘅言論暢所欲言，但就唔好引述其他人，包括佢嘅說話，費事大家引述時有出入喎！
常言道︰「事無不可對人言」，搞得諮詢又怕乜被人引述呢？如果煲呔曾淨係有佢講無人講，又唔識尊重班政協，睇怕佢喺明年「兩會」前最後一次諮詢人大政協意見時，班人大政協嬲嬲哋群起杯葛佢個諮詢會，到時佢要對住空櫈拍烏蠅就真係瘀到爆。
話時話，煲呔曾同人大政協會面只係名義上嘅諮詢，實際係向佢哋摸定底，睇吓大家有乜不滿，唔使等到「兩會」期間告御狀篤佢背脊，但煲呔曾執包袱在即，相信佢都唔怕人哋告御狀，所以又點會放呢班人大政協在眼內呢？