政情：潘佩璆呻從政大犧牲
食無定時、少運動量已同繁忙嘅都市人掛咗釣，好似早前就見到勞工界立法會議員潘佩璆，晏晝兩點半先至去買外賣叉雞飯返立法會開餐。潘佩璆無奈話，以前無咁忙，可以自己帶午餐盒，用生菜、番茄、火腿再加少脂肪嘅老牛肉做三文治，好味又有益，但做咗議員就無得咁滋陰，快快趣趣鯨吞外賣飯盒醫肚就算。
食得差少運動
做議員除咗食無定時外，潘佩璆就連最愛嘅跑步運動都要減少，以前佢做醫生每星期都可以跑廿二公里，但依家就忙到一星期只可以跑兩至三公里。○四年佢參加渣打馬拉松，跑十公里都喺一小時之內，但依家唔知仲有無咁好成績嘞，所以話做議員都要有所犧牲。
立法會明年就換屆，潘佩璆本身係精神科醫生，平時診症已經忙到震，如果要參選就更加忙。雖然有傳佢唔再參選，但佢話如果工聯會要佢選嘅話，佢一定會全力以赴喎。至於今個暑假，佢除咗去書展外，唯一娛樂就係同朋友返內地玩幾日。