公立醫院嘅醫療事故無日無之，直情好似流血不止咁。呢嗱嗱嗱，又爆醜聞嘞，今次雖然未至於搞出人命、未至於有病人中招，但如果發現遲啲咯喎，咁就好難講嘞！
件事係咁嘅，黃大仙佛教醫院日前突然發覺一部儲存血液嘅雪櫃壞咗，檢查後懷疑雪櫃故障引致電力斷路。但究竟壞咗幾耐，點解會壞，仲係矇查查，唯一可以肯定嘅，係雪櫃裏面嘅六十三包血液全部報廢。
本來呢，醫院嘅儲血雪櫃有雙重保障，出問題就會發警號，即時通知病房工作站處理，今次點解無人知呢？係咪有人當值時魂遊太虛，疏忽職守呀？根據院方嘅初步調查，雖然可能未至於魂遊太虛，不過都差唔多嘞，原來警報系統居然無端端被人調校至靜音，所以出咗事都冇人知囉，你話係咪奇怪吖？
六十三包血液報廢，糟蹋咗捐血者一片善心唔在講，最令人擔心嘅係，萬一變壞咗嘅血液無人察覺，一個唔該攞咗去輸畀病人，咁就大鑊嘞！功夫茶唔係危言聳聽㗎，夕陽政府五勞七傷，話唔埋隨時又有高官需要入廠做手術，如果咁好彩被輸入壞血，就算救得番都有排執手尾，咁就該煨咯！
所以話啫，香港嘅公共醫療真係病得好嚴重，輸錯血、打錯針、開錯藥、割錯乳房……醫療事故層出不窮，無奇不有，依家連儲存血液咁簡單嘅工作都可以出錯，仲有乜嘢可以令市民放心？呢嗱，話口未完，醫管局嘅《風險通報》又爆醫療醜聞啦，有病人左眼有事，點知醫生竟然左右不分，將麻醉藥注射落右眼；亦有醫護人員將紗布、顯影物料等等留喺病人體內，甚至將導管置入錯誤病人身上，問你怕未！
講番佛教醫院呢單烏龍嘢，醫學界直指事件係人為疏忽，監管出現問題；亦有人指事故涉及醫院資源不足，導致設施殘舊，人手不足。總而言之，醫院疏忽引致血液報廢，院方固然難辭其咎，但歸根究柢，罪魁禍首係港府監管烏厘單刀，搞到成個醫療系統亂七八糟。
話時話，一個食衞局局長周一嶽，一個衞生署署長林秉恩，都係渾渾噩噩過日。上樑不正下樑歪，高官渾渾噩噩，公立醫院監管甩甩漏漏何足為奇？醫療事故無日無之又何足為奇？所以話，醫療庸官呢啲壞血一日不除，公共醫療都幾難有得醫！