政情：田二少向溫總自薦查高鐵
溫州高鐵相撞事故搞到天怒人怨，溫總前日講明要徹查。新民黨副主席田北辰都話要出一分力，佢寫咗封信畀溫總自薦加入調查委員會，勢要查出邊個搞到車毀人亡。田二少話自己做過九鐵主席，又係人大代表，今次國家有難，出手係當仁不讓，佢又話今次自薦唔怕畀人話抽水，事關參加調查係要落手落腳做，唔係講吓就算。
懷疑另有內情
田二少話自從爆出溫州事故後，香港人對高鐵完全失去信心，日後高鐵香港段通車時，分分鐘無人敢坐，佢話自己做過九鐵主席，唔算得上係專家，但都算熟悉鐵路運作，一般涉及人命傷亡嘅交通事故，事後救援方程式應該係「救人、調查、通車」，但偏偏今次見到係「通車、通車、通車」，認為仲有內情未被揭發。
不過當年九鐵爆出西門子事件時，九鐵為免工程爛尾，要倒貼成億畀西門子，最尾搞到要行政總裁楊啟彥下台，九鐵高層又搞政變，做過九鐵主席嘅田二少最清楚。如果二少加入調查，唔知佢會唔會分享呢啲經驗畀其他人聽呢？