政情：黃灝玄做Greg蘇替死鬼
夕陽政府諸事不順，幫煲呔曾做事嘅人都注定冇運行，眾多決策局中，以商務及經濟發展局比較濕滯。前局長劉吳惠蘭因病辭職後，要由副局長蘇錦樑（Greg蘇）頂替外，該局負責嘅競爭法又畀商界插到飛起，加上早前發生嘅前政府資訊科技總監葛輝爆大鑊，已經令到局內上下一頭煙，就連年初先上任嘅常秘黃灝玄都不能幸免，前日喺一個活動上慘做煲呔曾同Greg蘇兩個上司嘅替死鬼，認真可悲。
廠商會前晚舉行會董晚宴，主題為「港資企業在內地發展情況」，仲請咗黃灝玄做嘉賓，佢致辭時講到政府為內地廠商提供咗乜嘢協助，講咗足足二十分鐘。去到答問環節，身兼廠商會會董嘅德國寶董事長陳國民第一時間質問黃灝玄，點解唔講吓商界最關心嘅競爭法，狠批競爭法條文唔清唔楚、又認為競爭委員會太大權力，一句說話就定中小企生死，要求解釋點解要先立法後諮詢。
面對會董如此狠批，黃灝玄仲唔識死，嬉皮笑臉話唔知在場商界人士有興趣聽競爭法，如果早知可以用多半個鐘至一小時講都得喎，又話競爭法委員會嘅訂定會提交立法會，再作公眾諮詢，叫大家唔好咁擔心喎。不過，縱橫商界多年嘅陳國民當然唔會咁易收貨啦，佢直截了當反駁，質疑如果委員會真係冇生殺大權，點解政府唔喺法例上寫清楚，陳老闆愈講愈唔開心，最後仲話：「政府打唔到大老虎，就搵中小企開刀！」
沈運龍：煲呔曾仇商
除咗陳老闆外，另一會董沈運龍亦深感不滿，發言時批評煲呔曾其實唔係仇富，但就仇商：「我知佢同地產商好老友，但就好仇商、仇視我哋啲商家呀！」佢話自己好支持社會要有公平競爭，但係中小企經歷金融海嘯，營商環境不斷變差，經營成本水漲船高：「到底政府明唔明乜嘢係休養生息？政府依家做法等同亂開藥，病人唔死就假，仲死得快啲添！」
面對無能嘅夕陽政府，商界怨氣爆燈實在可以理解，但黃灝玄主管工商及旅遊科，而競爭法係Greg蘇負責嘅，所以佢今次畀班會董狠批，可以講係做咗替死鬼，相信連佢自己都有啲錯愕。
不過，冇計啦，鬼叫佢有兩個庸官上司煲呔曾同Greg蘇咩，加上Greg蘇水鬼升城隍，難免身嬌肉貴，班下屬肯定變成龍門人牆，被人用波餅省到遍體鱗傷。