中環出更：假髮大王趙振國合法造「假」銷歐美
香港美髮美容業商會前日舉行新一屆理事會就職典禮，現場衣香鬢影，各賓客都悉心打扮一番，襯晒商會成員專為人扮靚嘅服務宗旨。卓妮咁貪靚，當然去趁吓熱鬧啦，見到商會榮譽會長、孖人牌代理昌興行政總裁余壽寧（Homer）恤咗個靚髮。而啱啱卸任嘅商會創辦人兼會長趙振國（CK）就成晚都好風騷，見商會成立六年就咁有人氣，難怪心情靚絕。
CK造假髮生意幾十年，被封為「假髮大王」一啲都唔為過，佢仲戲稱自己係合法造假嘢喎！咪以為擺脫唔到「地中海」困擾嘅大男人至會戴假髮，原來唔少女士都會喺白頭髮冒起初期戴假髮，等到下次染髮前遮吓醜先。雖然假髮可以令貪靚嘅人形象百變，但CK話，戴假髮成為時尚始終未成氣候，事關戴住假髮又焗又熱，好難受喎。
過去幾十年，曾經有幾次機會試過短暫流行戴假髮，但係好快又成為過去，難怪CK間假髮公司喺香港嘅零售店都捱唔住，依家淨係做出口，幫歐美大品牌做代工。
與菅直人同窗
Homer嘅家族生意涉足美容業都超過廿年，佢同CK相識多年，勁讚CK識飲識食，尤其係歎日本菜時，唔使睇住餐牌落柯打，而係由大廚發辦用最靚嘅食材炮製美食。問CK點解咁把炮？佢揭開謎底話，自己曾經喺日本讀書，同日本首相菅直人係日本工業大學嘅同班同學，深諳日本文化，所以同大廚零舍啱傾，梗係氹到最靚嘅嘢食啦！
卓妮