脫軌、甩轆、失控……呢啲都係鐵路事故嘅常見用語，不過，有時用嚟形容鐵路嘅管理，一樣咁貼切。遠嘅唔講，溫州高鐵追尾撞車慘劇，正正反映內地鐵路部門管理混亂，草菅人命。而講到香港咯喎，其實亦唔好得幾多嘅咋。
呢，話口未完，港鐵服務又出亂子喇！今次嘅經過係咁嘅，一名男子尋日朝早喺東鐵沙田站墮軌身亡，列車服務一度受阻。發生墮軌悲劇，固之然不幸，但港鐵嘅應變安排甩甩漏漏，混亂不堪，就更加令人慘不忍睹。
嗱，墮軌事故發生後，沙田往火炭列車服務一度中斷，咁嘅環境，港鐵係咪應該盡快安排乘客轉乘接駁交通工具呀？係，港鐵係有咁嘅安排，可惜係慢幾拍嗰隻，乘客等呀等，等呀等，接駁巴士等極都未到，搞到數百人喺沙田站外面大排長龍，酷熱天氣下乾蒸候車，期間有人打尖，有人投訴，亦有長者不適暈倒要送院，總之亂晒大龍。
好嘞，等咗大半個鐘頭，姍姍來遲嘅接駁巴士終於來到，但係搞笑囉，只係來咗兩部車咁大把。乘客爭先恐後上車，上唔到車嘅幾百個乘客惟有又湧番落港鐵月台，你話係咪慘過走難？混亂唔在講，安全最緊要，港鐵疏導乘客又慢又亂，今次就話有人墮軌啫，如果下次發生更大鑊嘅事故，豈不是隨時搞出人命？
喂，港鐵出事已經係家常便飯㗎啦，應變經驗理應厚過電話簿，點解仲會搞到倒瀉籮蟹、亂晒大龍？點解港鐵管理好似脫軌列車咁完全失控，不斷大倒退？唔怪得有乘客鬧爆港鐵只識加價，服務每況愈下，真係鬧得啱㗎。
所謂見微知著，一場墮軌事故，港鐵應變手足無措，內部管理混亂不堪，全部無所遁形。從今次事故，大家亦都應該明白，點解港鐵事故頻生，唔係呢度有事，就係嗰度出問題啦。
嗱嗱嗱，遠嘅唔講，日前東涌線列車又發生驚人車輪脫軌意外，仲係十日內第三單添，問你怕未。有學者質疑，港鐵事故不斷，係維修不足令組件提早老化所致；其實計功夫茶話齋，維修不足固然係其中一個原因，但罪魁禍首係港鐵管理老化兼日久失修就真啦。
一句到尾，鐵路服務好似逆水行舟一樣，不進則退，尤其港鐵嘅覆蓋網絡將會不斷擴大，而且仲起緊高鐵添，所以咯喎，內部管理、行車安全同服務水平亦都要與時並進至得㗎。唔係嘅話，一旦爆大鑊，溫州高鐵慘劇隨時喺香港重演都唔出奇呀！