耗資五十億興建的添馬艦新政府總部及立法會大樓極可能未能如期落成，原定計劃「攞頭彩」首先搬入添馬艦的煲呔曾，已確定需另訂搬遷日期，這意味煲呔曾計劃任內最後一份施政報告在新大樓宣讀將泡湯。
有地盤工人披露，他們除要開夜班及在假日開工外，近日天氣炎熱，更要被迫在氣溫高達攝氏四十二度的密閉空間工作，苦不堪言，有工人家屬去信行政長官辦公室訴苦，但不獲理會。有立法會議員批評煲呔曾好大喜功，為要在新立法會大樓宣讀施政報告，苦了工人。
煲呔曾接任行政長官七年，要是他真為港人做事，夕陽政府又怎會積聚咁多民怨？埋下咁多深層次矛盾？《湖南省志》第二十二卷記三味書室陳家嘅家訓：立身行己要有詩書味，和睦宗族要有家常味，處世接物要有人情味。這便是「三味」的來歷。依老朽看，做人，最緊要有「人情味」，這樣就不會飛揚跋扈，以為高人一等便可恃權勢凌人。
有麝自然香，江山何必庸人說？有料到的施政報告，即使臨時搭個棚或在空地廣場上即席宣讀照樣可以好感人，反之，官樣文章一味吹水「強政勵治」、「群策創新天」又有乜用？「新公屋，會有的，新居屋，會有的。」不過，大家忍耐吓，夕陽西下，明日朝陽東升，雲霞溢彩，生活總充滿希望。
夕陽政府推政策應快就慢，好似派錢，應慢就快好似替補機制。慢好過快，中國人好似好趕時間，樣樣要快要搶，一快就出事，高鐵是最佳例子。新大樓，快不得！