港澳辦主任王光亞日前不點名狠批煲呔曾「成也英國，敗也英國」，喺本港引發一場政治風波。王光亞做完黑臉，尋日立即有人出嚟扮白臉「呵」番煲呔曾。同中央關係密切嘅行政會議召集人梁振英（CY），尋日出席公開場合時，聲稱王光亞唔係針對煲呔曾喎。唔通中央擔心鬧到煲呔曾無地自容，佢會諗唔開做傻事？
王光亞日前喺北京會見本港大學生時，狠批本港公務員只識執行，不懂長遠規劃同做老闆，聲言「成也英國，敗也英國」。雖然佢並冇指名道姓，但唔使講都知佢係講緊煲呔曾啦！不過其實特區管治搞成咁，中央都要負上好大責任。近年不時暗批煲呔曾嘅CY，尋日就好罕有咁幫對方「護航」，聲稱王光亞嘅言論唔係針對任何人。CY同王光亞一軟一硬，一唱一和，唱雙簧玩殘煲呔曾。
CY之後話鋒一轉，大讚本港公務員，話佢哋又專業又能幹，定能與時並進，擺明係要擦公務員鞋攞票，煲呔曾話佢「抽水」真係冇講錯。至於事件丑角煲呔曾，尋日就透過特首辦喺社交網站facebook曲線回應王光亞，話無論係問責官員定係公務員，一直都同心協力制訂政策，推動香港長遠發展。連駁嘴都駁得鬼祟過人，真係抵畀人鬧。