政情：張建宗扶貧邀功捱轟
夕陽政府過去推出好多扶貧措施，都畀團體批評無實際幫助。鍾意曝光邀功嘅勞工及福利局局長張建宗（小肥張）月頭寫咗篇文章，話貧窮人數由○三年約一百萬人，大幅減少至近七十六萬人，顯示政府嘅扶貧工作有料到，字裏行間流露着沾沾自喜嘅態度，結果就辣㷫社福界權威周永新。
港大社會工作及社會行政學系講座教授周永新，尋日撰文叫小肥張唔好開心得咁早，佢話政府同民間團體對貧窮睇法有差異，民間團體就以住戶入息中位數一半做標準，會隨住經濟而變化，但政府一直以市民無辦法維持基本生活，要攞綜援先叫貧窮。當經濟好嘅時候，攞綜援嘅人自然減少，所以唔係扶貧措施有效，認為小肥張因而表現得非常滿意，完全係自我陶醉。
周教授仲話，即使少咗人攞綜援，但貧窮問題依然未解決，仲大把長者攞綜援、好多後生仔上唔到樓、跨代貧窮情況依舊。據聞小肥張尋日睇完篇文章，就話周教授分析持平，自己從來無邀功，亦無因為咁而開心喎。