政情：林武弦外音撐鼠王芬
大膽發表「懲罰選民論」嘅專業會議立法會議員梁美芬（鼠王芬），搞到民望插水式下跌，下屆選舉會否頓失中聯辦九龍工作部部長林武呢個大靠山，各界都金睛火眼
到實一實。
呢兩位男女尋日出席「美髮美容商會」就職典禮，兼且同坐主家席，林武竟然憑辭寄意，安慰鼠王芬。不過，記者要求佢哋合照時，兩人都異口同聲拒絕，真係唔話你哋合拍都唔得。
林武一到場，記者問佢仲會唔會支持鼠王芬參選下屆立法會，又問佢鼠王芬係咪講錯嘢，林武一概唔答。林武致詞時竟然藉「美髮美容」過橋，話呢個行業為人帶來歡樂、美麗，仲話每個人都會有唔如意、有瑕疵嘅時候，「假如我哋以一種關心、建設性態度睇呢個問題，給予佢更多關心，就可將佢嘅傷疤、皺紋磨平，而非揭人傷疤，支持佢恢復信心，相信社會有更多歡笑聲，社會更和諧。」
林武講到咁出面，連月來遭一沉百踩嘅鼠王芬聽在耳裏，唔知內心深處有冇感動到想喊出嚟呢？但只見佢微笑不語。