政情：哈囉喂厲鬼似唐唐？
海洋公園「哈囉喂」好快又開鑼，主席盛智文（扮嘢文）尋日按慣例扮鬼宣傳活動，但唔知點解主持人無啦啦講起疑似特首候選人「鐵三角」，仲話台上嘅「火爆Band友」厲鬼有啲似政務司司長唐英年喎。
盛智文扮「鬼王」
扮嘢文見慣大場面，冇被主持嘅說話嚇親，仲反問：「咁CY（行政會議召集人梁振英）呢？」主持環顧四周指住其中一隻鬼，但就話都係唔多似。最後扮嘢文仲問埋主持有邊隻鬼似全國人大常委范徐麗泰，主持就惟有答話：「Too beautiful」，無鬼似佢喇！
扮嘢文喺之前嘅哈囉喂扮過殭屍、紙紮公仔、鬼新郎、中國皇帝及孟婆等角色，佢今年就以「鬼王」裝扮示人，仲變身做哈囉喂共和國國王。佢個造型塗到成塊臉金色，貼晒鬍鬚，黐埋假眉毛，仲戴住個假髮同巨型帽子，但唔知係咪頂帽太重，經常向前跌，令佢顯得有啲尷尬。