政情：市政局時間囊變垃圾
歷史代表一個地方嘅傳承，夕陽政府不但冇珍而重之，仲好似當垃圾咁埋咗去堆填區。本報早前報道被「殺局」嘅市政局回歸前喺中環大會堂紀念花園埋下時間囊，揭發有關方面將一座大型花卉壓住埋藏時間囊嘅位置，意圖令市政局嘅歷史靜悄悄消失喺世上。雖然當局近日終於「認衰」，派人將有關花卉搬走，但仍然唔肯盡快開啟有關時間囊。
時間囊記載住歷史發展嘅軌迹，即將搬遷至添馬艦嘅立法會已喺本月中舉行盛大儀式將回歸前埋藏嘅時間囊「出土」，但相比之下，被「殺局」嘅市政局就無咁好彩，因為佢哋喺九七年埋藏嘅時間囊，原定應該喺十年後嘅○七年重見天日，但未知政府是否因「殺局」後心虛，直到今日對重開時間囊嘅時間表諱莫如深，不難令人聯想當局「去市政局化」。
據聞當年深受「殺局」傷痛嘅立法會議員李華明尋日正式「出招」，去信康文署第一把手馮程淑儀，要求對方回覆開啟時間囊嘅時間表同相關安排，同時盡快組織當年三十名市政局議員一同參與有關儀式。康文署回應時只係話，大會堂正探討開啟時間囊嘅法律同技術事宜，可能會喺明年大會堂慶祝五十周年期間開啟該時間囊，總之推三推四、拖得就拖嘅意圖明顯不過喇！
文物時間囊恐同一命運
夕陽政府希望遺忘嘅歷史又點只咁少！我哋仲發現臨時市政局及臨時區域市政局喺九九年底，喺當年兩局轄區交界嘅荔枝角公園埋下咗「文物時間囊」，預計於二○二○年開啟，但前臨時區域市政局議員周奕希見到有關方面咁草率咁處理時間囊問題，都驚佢哋個時間囊會遭遇同一命運，所以要求當局盡快交代邊個部門負責跟進該時間囊問題。
當年政府手起刀落殺局，一切交接都交代得清清楚楚，無理由漏咗啲時間囊無部門處理。當年一眾議員設立時間囊都係想記下歷史，兼且做個紀念，如果夕陽政府連一兩個時間囊都容不下，最後又觸發另一場政治風波，相信只係咎由自取。