中環出更：杜擴業揸電筒 驗紅酒真偽
爸爸鍾意嘅嘢，好多時連囝囝都會耳濡目染，好似「快勞夾大王」杜振源（Simon）同囝囝杜擴業（Michael），兩父子都一樣鍾意紅酒，所以作為八十後嘅Michael，年紀輕輕已經係酒評家，仲經常飛去唔同嘅產酒區選購靚酒返香港收藏同請客，咁啱佢早前就去咗法國勃根地（Burgundy）朝聖。
Michael話，今次去睇呢批酒比較罕有，加上賣家又未見過，所以特登喺阿爾薩斯坐兩個鐘火車去拜會對方。其實無論幾貴嘅酒，唔開樽根本好難百分百確定係咪靚酒，惟有從外表觀察。當日Michael隨手攞起一支手電筒照吓紅酒清定濁，又睇吓有冇少咁啲酒，仲對吓個酒塞上嘅名稱同支酒係咪相同，雖然啱名都未必係真，但唔同名就肯定係假啦！
自力更生 不靠父蔭
Simon當年白手興家，Michael比較幸福，大學畢業後問爸爸借錢創業，但依家已經還咗四成，其餘六成，佢有信心喺未來兩年還清。Michael坦言，爸爸最討厭裙帶關係，所以佢哋三姊弟都自力更生，不靠父蔭。