中環出更：伍威全親演好客之道
旅發局經常向服務業推廣好客之道，究竟服務態度點至夠呢？睇吓美心發展（中國）執行董事兼總經理伍威全親身示範就知道。
讓座予三口家
卓妮前日行過置地廣場，見伍威全喺旗下美心「飯堂」Cafe Landmark同朋友食晏，佢哋揀咗個近窗口嘅卡位坐低，食到咁上下，佢個朋友先行離開，而佢就繼續坐喺度，跟住就上演一場好客之道。
正當伍威全等候侍應埋單之際，佢留意到隔籬圓枱有對夫婦帶住個囡囡坐喺度，於是招手叫侍應過來，話可以讓自己個卡位畀佢哋，果然個小女孩轉坐卡位之後，當堂生猛晒，一時望落樓下個噴水池，一時又同媽咪玩自拍，連等埋單嘅伍威全都露出滿意笑容。佢等咗一陣，侍應就攞張單畀佢簽名，順便畀埋包外賣佢攞返寫字樓。
卓妮上前同伍威全打個招呼，順便讚吓佢讓位幫美心省靚個招牌，佢就話橫掂都食飽，所以早啲讓張枱出嚟，等客人坐得舒服啲喎！
伍威全又話，除咗撐公司旗下食肆外，佢都會去幫襯其他食肆，加上公司都有同事專責做研究，咁先可以等客人食到好嘢喎！
卓妮