投訴：工料擺邨口阻居民出入
貨櫃喉管長放路邊，市民多番投訴情況仍未有改善。黃先生指油麗邨第四期近油塘里入口，長期擺放一個長近二十四呎的貨櫃及喉管，黃曾多次向房屋署了解，均獲覆貨櫃為外判商臨時放置工料之用，但黃質疑「有咩理由臨時都放成大半年？啲嘢塞住晒緊急通道，萬一有事咁點算？」
油麗邨物業服務辦事處發言人指出，上述空地不屬緊急車輛通道範圍，早前油麗邨第四期正進行加建水管改善工程，期間曾借用上址部分地方擺放工料。有關改善工程經已全部完成，剩下的貨櫃亦會於七月底、維修工程完成後搬離現場。
當區區議員呂東孩表示，曾於邨委會反映居民關注。呂又稱，雖然上址道路寬闊，對緊急車輛出入不會構成影響，但亦不應長期佔用道路，「周圍放啲工料都唔雅觀，最好就盡快清咗佢﹗」