無牌賓館氾濫 懶官坐視禍患

重慶大廈發生火警嘅地方一度懷疑係無牌賓館，而且又係十字豆腐嘅劏房，借問聲香港總共有幾多無牌賓館？再借問聲，聲稱依法治港嘅特區政府有冇好好監管？為咗追求答案，本報記者明查暗訪，得出少少蛛絲馬迹。

記者走去旺角一間無牌賓館放蛇，向賓館職員話要留宿五日，親眼見到現場環境完全冇任何消防灑水系統，一旦火警後果堪憂。記者其後以不適合為由離開，職員即刻又落嘴頭推銷嘞：「呢度唔啱心水呀？唔緊要！我搵人帶你哋去第二度睇吓啦！」然後由另一名女士帶記者去到另一條街嘅賓館。問題係，現場所見同樣不設滅火筒以及灑水系統等等消防設施。根據牌照處資料顯示，呢一間所謂賓館未領取旅館牌照。事件反映，無牌賓館已經肆無忌憚連鎖式經營。

旺角另外有一間賓館仲搞鬼，門口掛一個招牌自稱「公司辦事處」，實際上係掛羊頭賣狗肉。更大鑊嘅問題就係，單位大門附近嘅角落堆放大量雜物，旁邊又有煮食爐同電器，走廊十分狹窄嘅情況之下，走火警絕對係超高難度動作。

好嘞，無牌賓館氾濫嘅原因係乜呢？一來當然係有利可圖，遊客貪小便宜就會幫襯呢一類山寨式賓館，二來咯喎，牌照處監管不嚴。牌照處就違規經營賓館嘅檢控數字一向偏低，去年只有三十九宗，今年截至六月亦只不過二十三宗。難怪香港旅遊業賓館聯會主席劉功成炮轟政府冇決心解決，導致無牌賓館問題日益嚴重。旅遊界立法會議員謝偉俊亦批評政府執法不力，要求檢討發牌機制，加強執法同宣傳。

唉，講來講去都係老毛病，一字記之曰懶。喂，僭建風暴點嚟㗎？咪就係長年累月放之任之囉，卒之搞出一個大頭佛，連特首局長都受到千夫所指。無牌賓館問題又係咁，既然記者放蛇都可以搵到咁料，功夫茶打死都唔信堂堂一個政府冇能力揪出一大串不法分子。非不能也，實不為也，懶骨頭係禍患之源。

計功夫茶話齋，既然劏房要取締，無牌賓館當然亦都要取締，官場大懶蟲如果繼續坐視不理，燒死人嘅奪命大火隨時燒到政府總部後欄失火！