日本大地震加核輻射危機，令唔少過往好鍾意去東瀛旅行嘅港人卻步，但一講到有得免費遊日本，有啲人就連地震輻射都一於好少理。我哋講緊嘅，係立法會食物安全及環境衞生事務委員會嘅日本訪問團，該團只得三個免費名額，但係就有成七位議員，最後肯定又會爭崩頭。
呢個訪問團由日本外務省主動邀請，機票、食宿同當地交通使費，統統由日本方面負責，用意係等本港議員實地了解吓日本地震後嘅最新情況，遊覽地點包括東京，以及一個日本方面同意下嘅自選地點，全程預計五日，九月廿六日出發。
截至尋日，已有七名議員表明有意報團，包括食安委員會主席張宇人、普通委員李華明、方剛、李國麟、黃成智、梁家傑同埋黃毓民。由於主席肯定有份去，即係由六名議員爭餘下嗰兩個名額。今次免費遊日爭奪戰最後由邊個勝出？係透過抽籤定生死、定係經黨派協調同枱底交易分豬肉解決？下個星期一委員會開會後就知曉！