政情：工商科隨時變「工傷科」
尋日本報獨家報道，商務及經濟發展局轄下嘅工商及旅遊科，現時位於金鐘太古廣場嘅辦事處就快租約期滿，必須下個月搬去添馬艦新政府總部大樓。當局尋晚終於回覆我哋查詢，證實工商科辦事處八月一日搬家，仲話屆時會分隔開職員同工人行嘅路，相信唔會影響新辦事處運作。依家添馬艦仲係地盤，即使行人路可以分隔，但噪音、沙塵就肯定分隔唔到，唔知佢哋返工使唔使戴安全帽同耳塞呢？
據聞新政府總部內籠仲係立立亂，尋日商務及經濟發展局回覆，工商科位處嗰層嘅內部裝修已經完成，換言之其他地方完工未就唔肯定喇。另外建築署會分隔開政府職員往返辦公室，以及工人往返工地嘅路，「相信」工商科喺新總部返工唔影響運作。此外，商務及經濟發展局轄下嘅旅遊事務署，亦計劃今年十月搬遷，而旅行代理商註冊處則暫無計劃搬離合和中心。
大家經過添馬艦都可以睇到，嗰度仲係一個地盤，但係工商科職員就要去嗰度返工，大吉利是如果有乜閃失，咁就真係工商科變「工傷科」。再者嗰度仍然處處工程，噪音同沙塵滾滾在所難免，相信班職員都會覺得唔搬好過搬囉。