政情：李業廣：強積金好過冇
強積金實施唔經唔覺已十年，由推行至今仲係被廣大市民批評保障唔到退休生活，但估唔到強積金制度開國功臣都有類似睇法。
積金局最近出咗本十周年特刊，訪問番幾位開國功臣講吓感受，其中擔任首位主席嘅李業廣坦言，強積金並非解決退休保障問題嘅萬應靈藥，從一開始就知道單憑強積金無可能完全保障市民退休生活，但點都好過乜都冇喎。
肥龍話要睇多廿年
不過，對於強積金未來發展如何，當年做積金局首任行政總監嘅「肥龍」許仕仁就話好難答；對於強積金係咪有效保障到市民退休生活需要，佢更加話要睇多十年、廿年先有答案喎。咁即係話強積金係咪咁有效，市民真係要放長雙眼先睇到喇。
肥龍係當年一手一腳睇住強積金誕生嘅人，佢講番當年立法局最初辯論強積金條例草案時，佢仲未係財經事務局局長，當時佢身處北京，已預感成個計劃好可能會胎死腹中，點知第二日收到個電話，對方就話：「仕仁，強積金呢單嘢，你都係走唔甩喇！」結果呢單非常任務後來就落咗喺佢手上，佢直頭話係九八年入市打大鱷一役之外，強積金係最大同最艱巨嘅工作。