政情：建制派跳離賊船自保

替補機制一役猶如照妖鏡，將夕陽政府無原則、只要夠票通過嘅心態表露無遺，搞到政制及內地事務局局長林瑞麟都有恃無恐，深明無論做唔做諮詢，建制派都會支持，令建制派啞仔吃黃連有苦自己知。不過，適逢今明兩年選舉年，建制派都唔想凡事盲目附和政府，擔心失去選民支持。

民記隨「民風」擺柳

據悉，民建聯最近舉行嘅中委會討論過替補機制嘅最新形勢，會上確認要堵塞呢個辭職補選搞變相「公投」嘅漏洞，但最重要係佢哋會做民調了解市民最接受邊個方案，因為民意會成為佢哋支持邊個方案嘅重要指標之一。此舉擺明唔想再同政府成為「有辱無榮」嘅命運共同體。

有民記核心成員話，既然政府之前已錯失咗提出替補機制方案嘅好時機，依家根本唔使咁急去做，如果泛民主派再次辭職補選搞「公投」，到時市民自然會支持替補機制。另有建制派中人亦唔客氣話，太早表態支持邊個方案都容易成為被針對嘅對象，與其將自己放喺火山口，不如謀定而後動好過喇！

替補機制諮詢跣到建制派攤攤腰，前車可鑑，最近就有建制派中人主動出擊解決備受爭議性嘅議題，先有「法律超人」立法會旅遊界議員謝偉俊率先發起反對外傭有居港權嘅關注群組，陸續亦有政黨評估事件對香港短期至中長期嘅影響，至於係唔係要就此提請人大釋法，建制派都明顯學精咗，寧願三緘其口睇定民意嘅風向先至再表態。

老實講，夕陽政府已到達喪失管治意志嘅地步，建制派與其再有幻想，倒不如自求多福，否則到時畀夕陽政府欺騙多一次感情後，又再跳一次船就無謂啦！