中環出更：高鼎國：鐘錶設計趨內地化
隨着內地個人遊蜂擁來港購物消費，產品設計已逐漸趨向內地化，除咗時裝外，原來鐘錶設計都一樣轉變緊。香港鐘錶業總會尋日喺尖沙咀海港城搞咗個腕錶展，身兼總會副主席嘅英納格大中華區總裁高鼎國話，自從金融海嘯後，腕錶款式潮流係傾向錶面愈來愈大，但係花巧就愈來愈少，設計回歸簡約，但貴價金屬仍被廣泛使用，甚至乎鑲鑽石添！
借太空熱推銷品牌
高鼎國話內地客大幅增長，生產商為投其所好，就要設計一啲合乎佢哋胃口嘅產品，換言之，內地消費者漸漸主導鐘錶業嘅潮流。至於佢旗下嘅腕錶品牌，係源於六十年代因應邁向太空熱潮，因而選用土星做商標．雖然係四十幾年前嘅設計，但由於內地嘅神州太空船及嫦娥探月計劃，又再掀起一股太空熱，相信可順住勢頭走紅神州。
尋日總會永遠名譽會長孫秉樞都有出席，佢都好認同相同嘅產品換上唔同嘅商標，售價就相差好遠。卓妮每次見孫秉樞，佢總有新產品推介，今次就係佢代理嘅品牌會推出光動能衞星定時腕錶，相信又會帶領潮流，但想睇吓隻錶有幾勁嘅話，就要等秋季喇。
卓妮