中環出更：絲路騎駱駝梁世華險撻傷
敦煌係古代絲綢之路上嘅名城重鎮，旅遊人氣指數極高，廠商會行政總裁梁世華（Paul）都趁暑假同太太暢遊敦煌及蘭州，發生好多難忘嘅經歷，印象最深係人生首次騎駱駝，仲差啲畀駱駝拋跌，認真驚險。
穿梭敦煌石窟
遊敦煌，阿Paul彷彿置身大觀園，佢同友人穿梭大小著名石窟，舉頭盡是瑰麗壁畫及莊嚴佛像，嘆為觀止。可惜嘅係，部分古蹟歷經千年歷史，因為日久失修而顯得破落，真係睇見都心酸，所以近期陸續有團體及善心人捐錢到當地保護敦煌石窟，令中國珍貴歷史事迹得以流傳。
阿Paul又拉隊遊覽著名景點「鳴沙山」，欣賞塞外風光。佢三扒兩撥好瀟灑咁騎上駱駝背，點知「駝夫」話咁快鬆手放開駱駝，令本來跪喺地上嘅駱駝，登時企起身並向前跑，嚇到阿Paul不知所措。幸好佢平日勤做運動，身手敏捷，飛身捉實駝背上嘅手柄，總算係有驚無險，後來佢仲騎住駱駝「慢」遊沙漠一小時，相當寫意。
去到蘭州，當然要四圍「搵食」，地道蘭州牛肉麵風味十足，阿Paul同太太食到唔停得口。臨走前，再狂掃絲綢頸巾，收穫認真豐富。
卓妮