百元新鈔鬧笑話 官衰扯旗倒轉掛

唔係老作o架，事實上的而且確鬧出一個咁荒唐嘅笑話。滙豐銀行剛剛公布一百元新鈔樣式，先唔講新款設計係美輪美奐抑或醜到不堪，當中最大鑊嘅係犯咗政治上一個極之低級嘅錯誤：特區區旗上下倒懸。

嗱嗱嗱，將象徵主權嘅物品倒轉展示係可大可小o架，隨時犯下滔天大罪。好似英國咁吖，法例寫明「將印有英國君主頭像的郵票倒貼在信封上即犯下叛國罪」。你知啦，香港一來師承英國，二來又愈來愈中國化，對於煽動顛覆國家政權嘅不法分子好敏感o架，萬一有人認為滙豐新鈔利用倒懸區旗嚟鼓吹叛國，發起紫荊花革命之類，咁就大件事咯！

原本呢，一般旗幟圖案都以旗杆在左為準，假如旗杆在右，圖案應該對反。香港特區區旗上面嘅紫荊花瓣尖應該係順時針指向，不過滙豐新鈔嘅旗杆置於右邊，花瓣尖竟然唔係對反嘅逆時針指向，仍然處於順時針狀態，好明顯設計錯了。

設計錯了又如何？錯就要認，打就企定，滙豐銀行、金融管理局以及政務司司長辦公室轄下行政署急急腳發表聯合聲明，承認滙豐銀行一百元新鈔設計區旗部分出現問題。

聲明內容更加披露，新鈔由作為發鈔銀行嘅滙豐負責設計，經由金管局審閱，而含有國旗同區旗嘅設計就由行政署審閱，但三個單位都冇發現相關問題，衷心表示歉意咁話喎。滙豐銀行立即修訂設計並且改版印製，務求明年初將新鈔推出市面，農曆新年有得封利是，有關改版費用由滙豐一力承擔。

你話嘞，係咪官衰扯旗倒轉掛？堂堂一個行政署，堂堂一個金管局，居然盂蘭節未到就鬼眼，審閱審到發雞盲，集體為錯體鈔票提供一條龍服務。如果你係陰謀論者，你可能會有一個咁嘅質疑，係咪故意o架？事關錯體鈔票有時好值錢，假如唔知點解會有倒掛區旗嘅百元新鈔流出市面，呵呵！嘿嘿！哈哈！橫財就手咯！

當然啦，陰謀論嘅機會率相對比較低，最大可能始終係政府行衰運。冇辦法，性格決定命運，弱勢政府吖嘛，夕陽政府吖嘛，撞板政府吖嘛，當你見到連財爺派錢都係床下底劈柴，撞正大板嘅時候，百元新鈔傳出江湖鬧笑話冇乜出奇。

功夫茶奉勸財爺曾俊華，派錢還派錢，唔好派錯錢，如果有人收到錯體鈔票甚至假銀紙，呢個笑話會變得欲哭無淚！